A relación coa nai – Obradoiro en Compostela

Benqueridiñas

Sabedes que o obradoiro A RELACIÓN COA NAI é un espazo que levo anos querendo convocar… e á fin é posible para min facelo! E facelo desde o corazón e coa ilusión de facilitar o camiño que cada unha queirades percorrer.

Sabedes que o vínculo coa nai é un vínculo que ás veces non é doado… Falámolo en moitas ocasións nos obradoiros… Coa nai aprendemos a vincularnos no resto das nosas relacións. Tamén na relación coas nosas fillas e fillos.

Estea viva ou xa falecida, precisamos revisar ese pacto inconsciente que establecemos coa nosa nai. Precisamos recolocarnos na relación con ela, para poder estar en paz con nós mesmas. Para aceptarnos coma completamente valiososas, capaces de amar e de ser amadas. Para poder recoñecer e honrar ás nosas ancestras, e crear alianzas con outras mulleres. Para facer as maternaxes que decidamos na nosa vida e vivir os vínculos desde o pracer e o Botrato.

Esta é unha viaxe cara á nosa autonomía emocional, para vivir como as mulleres adultas que somos. Desde nós mesmas. Facéndonos cargo da nosa vida. En liberdade!

É unha fermosa viaxe que faremos desde o corazón, escoitándonos, con amabilidade e respecto ao noso ritmo. Unha fermosa viaxe cara a nós mesmas…

Por suposto, podes facer extensiva esta invitación a outras mulleres que poidan estar interesadas: amigas, irmás, tías, madriñas, nais ou fillas, parellas, colegas, veciñas…

Máis abaixo aparece toda a información sobre datas… Unha apertiña.

Silvia Federici en Galiza

Neste mes de abril, estivo con nós -na Galiza-  Silvia Federici (1942, Italia), escritora, profesora e activista feminista de renome e traxectoria internacional.

Primeiro, estivo en Pontevedra o luns 7 deste mes de abril, abrindo a XXXV Semana Galega de Filosofía, promovida pola Aula Castelao baixo a epígrafe de Filosofía e o Común, coa ponencia Mulleres e a reconstrución do común, á que podes acceder aquí.

Ao día seguinte, martes, participou na inauguración da Escola de empoderamento feminista de Coruña, coa conversa aberta A nova caza de bruxas, coidados e comúns. Desafíos das loitas feministas do século XXI , que tamén podes ver e escoitar aquí.

Silvia Federici é a pensadora que empezou a argumentar que o traballo reprodutivo e de coidados realizado polas mulleres de balde é a base sobre a que se sostén o capitalismo e que impulsou -xa nos anos setenta- diversas campañas para reivindicar un salario para o traballo doméstico.

Dúas das súas obras máis coñecidas son Calibán y la bruja: mujeres, cuerpo y acumulación originaria (2004)​ e Revolución en punto cero: trabajo doméstico, reproducción y luchas feministas (2013).

Na actualidade é profesora emérita da Universidade Hofstra de Nova Iork e un referente inceustionable do feminismo desde os seus presupostos marxistas.

Desmontando o mito do amor romántico – Conferencia de Marcela Lagarde

Hoxe no obradoiro de “Vínculos amorosos e relacións afectivas” falamos do amor… E como non podía ser doutro xeito, da magnífica pensadora feminista mexicana, Marcela Lagarde, que deconstrúe o mito do amor romántico.

Chis, unha compañeira do grupo, fíxonos a suxestión de acceder en Youtube a algunha das conferencias de Marcela… Escollemos: “Desmontando el Mito del Amor Romántico”, que foi impartida en decembro do 2013 no Centro para la Igualdad “8 de Marzo”, como parte da programación da Escuela de Pensamiento Feminista ‘Clara Campoamor’, de Fuenlabrada (Madrid) e segue a ser de total actualidade…

Para escoitala, fai clic aquí: Desmontando o mito do amor romántico.

Marcela Lagarde y de los Ríos é autora de artigos e libros numerosos e de interese evidente. Entre eles, destacamos Para mis socias de la vida, editado por horas y HORAS (2005) e que inclúe tres libros: “Claves feministas para el poderío y la autonomía de las mujeres”, “Claves feministas para los liderazgos entrañables” e “Claves feministas para las negociaciones en el amor”. De lectura atraínte e doada, paga a pena!!!

Outra obra de interese da autora é o libro Los cautiverios de las mujeres. Madresposas, monjas, putas, presas y locas. Froito da súa tese de doutoramento, nel analiza as diversas dimensións da opresión das mulleres. É un texto máis complexo e moi suxestivo.