Mulleres labregas polo Botrato

Esta pasada fin de semana, labregas das diferentes comarcas do país celebraron o seu XVII Encontro Anual da Secretaría das Mulleres do Sindicato Labrego Galego ao redor do lema “Identificando as violencias e construíndo o bo trato“.               

Tiven o privilexio de acompañar o domingo pola mañá o espazo de obradoiro “Maltrato e Botrato. Eu escollo o Botrato na miña vida“. Alí compartimos vivencias, algunhas ben dolorosas e outras coma ansias e camiños de botrato para as nosas vidas… Graciñas compañeiras!!!

Velaquí dous momentos do espazo…

Fotos do obradoiro de Autocoñecemento para o Cambio…

Velaí van dúas fotiños da última sesión do obradoiro de Autocoñecemento para o Cambio que rematamos este pasado domingo 12 de marzo…

Toda unha viaxe persoal e colectiva que desfrutamos…

“Círculo de Mulleres. Inspira” para mulleres entre 18 e 25 anos…

Ana Seijo Cuba, psicóloga e terapeuta Gestalt formada en Musicoterapia, Videoterapia e Arteterapia, e participante en espazos de Terapia do Reencontro, envíanos esta prometedora convocatoria para a súa divulgación. Desde Alento e en colaboración con Mandala, ela e mais Beatriz Viñal González van facilitar o espazo “Círculo de Mulleres. Inspira“, un espazo de coidado para mulleres de 18 a 25 anos.

Será os sábados 29 de marzo, 29 de abril e 27 de maio, cun retiro de remate no mes de xullo. A inscrición ata o 17 de marzo… Podes acceder ao resto da información máis abaixo.

Moito éxito para este fermoso e tan necesario proxecto, Ana!!!

 

Obradoiro: Recuperando o corpo en positivo. Unha sexualidade desde o pracer e para o Botrato

Benqueridas compañeiras

Velaí esta invitación para un novo espazo de encontro desde o botrato: o obradoiro teórico-práctico para mulleres “Recuperando o corpo en positivo. Una sexualidade desde o pracer e para o Botratro”.

Imos parar a escoitar o noso corpo para deixar de vivilo como un lugar de dor, aprender a valoralo e vivilo en positivo. Precisamos escoitar o noso corpo para decidir as cousas da nosa vida desde nós mesmas… Calquera persoa podemos sentir pracer e benestar, e tamén dalo e recibilo… Iso é vivir o corpo desde o pracer, vivir en equilibrio e con saúde integral…

Traballaremos diferentes aspectos de autocoñecemento: a linguaxe corporal e a integración corporal, respiracións, os sentidos corporais e as fantasías eróticas, globalidade e xenitalidade, relaxacións, coidado e autocoidado, saúde integral…

Faremos esta preciosa ruta en Compostela, os domingos 2, 16 e 30 de abril e 7 de maio, en horario de 10h30 a 18h.

Desta volta podes facer extensiva esta invitación a outras mulleres da túa vida: amigas, parella, irmás, fillas, colegas, veciñas…

Para apuntarte, chama ao 639 20 36 69 antes do luns 20 de marzo. Coma sempre, as prazas van ser limitadas.

Unha apertiña.

Unha nova oportunidade de autocoñecemento: a Lectura de Rexistros Akáshicos

Benquerida/o compañeira/o

Hoxe chego cunha proposta un pouquiño diferente, pero especialmente fermosa e transformadora.

Quero invitarte a unha Lectura de Rexistros Akáshicos, unha metodoloxía na que me formei no ano 2021 e da que levo facendo sucesivas prácticas, todas elas moi beneficiosas para as persoas que participaron nelas. Quero ofrecercha agora coma unha posibilidade máis no teu camiño de autocoñecemento.

Que é unha Lectura de Rexistros Akáshicos?

A través dunha sesión individual axúdoche a chegar ao centro do teu ser  para que atopes respostas a preguntas da túa vida. A isto chámaselle Lectura de Rexistros Akáshicos (ou tasmén Lectura do Libro da Vida ou Lectura do Libro da Alma).

Os Rexistros Akáshicos son un espazo enerxético onde se garda a memoria universal de todos os seres (como unha especie de “Internet Cósmico”). Neste campo de información predominan a enerxía positiva e un amor incondicional.

A Lectura de Rexistros Akáshicos é un xeito de entrar nese campo de información para acceder á nosa voz interior e confiar nela ao vela confirmada por unha persoa externa, ampliando así o noso autocoñecemento.

Permite unha apertura consciente á nosa sabedoría interna -sempre amorosa– que nos conecta coa alegría e a paz fondas que aniñan no noso adentro máis íntimo.  

Como se desenvolve unha sesión?

Ti fas unha serie de preguntas, abrimos o espazo dos teus Rexistros Akáshicos e lemos a información canalizándoa desde o corazón e expresándoa en voz alta. Podes facer preguntas relacionadas con calquera aspecto da túa vida: a familia, o traballo, a parella, a saúde, os teus animais…

Preguntas como: Que teño que aprender da situación X? Que crenzas ou guións de vida me limitan no tema X (traballo, diñeiro, amizade…)? Como podo mellorar a miña relación con X (nai, pai, parella, amiga/o…)? Cal é o propósito da miña vida? Por que teño esta sensación de soidade/ira/abandono/perigo… na miña vida e que podo facer para soltala? Que me quita tempo/vitalidade/alegría/enerxía… na miña vida? Como podo orientar a miña vida profesional/amorosa/familiar…?

As respostas son respostas desde o corazón e adoitan ser concretas e concisas. Axudan a comprender e tamén a tomar decisións desde o adentro, desde ti, con claridade. Con elas ordenamos o pasado e o presente, sandamos feridas, eliminamos bloqueos… facemos camiño de crecemento persoal.

Unha sesión posibilita a sanación a diferentes niveis e sempre ten por finalidade axudarnos a atopar paz interior e ser máis felices. Cando o corazón fala é para que poidamos sentir todo o amor e a plenitude que están en nós, e sobre todo hai claridade e seguridade para ampliar o poder da nosa vida con consciencia e eficacia.

Se algo resoa en ti ou queres facer calquera pregunta, podes poñerte en contacto comigo a través do was, do correo-e ou chamándome ao 639 20 36 69.

Dáme moita alegría poder compartir contigo esta nova ruta de autocoñecemento e botrato.

Apertiñas cálidas desde o corazón.

Como inflúen no cerebro a postura corporal e as expresións do rostro…

De sempre escoitamos que tiñamos cinco sentidos: o olfato, o oído, a vista, o tacto e o gusto…

A coñecida neurocientífica Nazareth Castellanos -da que temos recollido varios artigos e videos nesta páxina- fálanos de dous sentidos dos que empeza a falar a neurociencia. Son a interocepción e propiocepción.

A interocepción ten que que ver coa información do noso propio organismo, do que lles está a pasar aos nosos órganos; unha información que lle chega ao noso cerebro e que é prioritaria para el. En concreto, fálase da importancia do corazón, da respiración, do estómago e do intestino.

A propiocepción ten que ver coa información que lle chega ao cerebro de como está o noso corpo por fóra: a postura, os xestos, as sensacións… “Se teño unha cara enfadada, o cerebro activa mecanismos de enfado… cando o corpo ten unha postura propia de estar triste, o cerebro activa mecanismos neuronais de estar triste”.

Podes ler o artigo presionando aquí

Como inflúen no cerebro a postura corporal e as expresións do rostro, ou cal é o poder dun sorriso sabémolo ben quen nos iniciamos na Terapia do Reencontro e traballamos todo isto co corpo da dignidade, coa respiración polos pes e con moitas outras ferramentas…

Valorando os nosos corpos de mulleres?

É sorprendente ata onde somos capaces as mulleres de non valorar o noso corpo e mesmo de mancalo para responder ás modas e estereotipos dominantes, para compracer as demandas das nosas parellas masculinas e así non “quedar soas”.

Vivímolo moitas veces sen darnos moita conta, desde mensaxes e mandatos aparentemente suaves e sutís, pero que condicionan en negativo a nosa autoimaxe e moldean as nosas eleccións…

Unha noticia destes últimos días ilustra dramaticamente este grao de maltrato que, como neste caso, pode chegar a ser extremo.

Podes facer clic aquí para acceder á noticia.

A outra noticia tén que ver cunha fermosa experiencia no concello de Sober, na que Patricia González e Ana de la Torre -traballadoras sociais do concello- artellaron Inmarcesibles, unha mostra fotográfica na que participaron 25 mulleres da comarca, que se deixaron fotografar para mostrar a beleza real das mulleres que a sociedade se empeña tanto en agochar.

Se queres acceder á noticia pincha aquí

 

A construción da masculinidade (Vigo ) – Círculo de homes

O compañeiro Senén envía esta convocatoria a tres encontros nun Círculo de Homes ao redor de “A construción da masculinidade“. Organizados polo grupo de homes EHeh!, estes encontros van ser en Vigo, os sábados 21 de xaneiro, 18 de febreiro e 18 de marzo, en horario de 10h a 12h.

Para inscribirse hai que facelo neste formulario: https://forms.gle/PkDbhYSfRNs1dK4q6

Que regalo iniciativas coma esta! Deséxovos gran éxito!

Reproducimos aquí as palabras da convocatoria:

“Ola compañeiro! 

Comeza un novo ano, comeza un novo ciclo de homes EHeh!

O tema vertebral nestes tres encontros é “A construcción da masculinidade”. Haberá un espazo para traballar o que precise de ser expresado no momento, atendendo as necesidades do grupo.

Agardo que sexa do teu interese e vémonos no círculo de todalas posibilidades.

Saúde, amor e propósito.

Senén.”

Monográfico para homes sobre masculinidades e violências machistas

O compañeiro Aarón, membro do grupo de homes “Cebolos”, acaba de enviarme información sobre un “Monográfico para homes sobre masculinidades e violências machistas” que están a organizar e convocar, e que se vai desenvolver en Compostela no Centro Social A Gentahla do Pichel.

O curso, destinado a homes a partir dos 16 anos, consta de 8 sesións en horario de 10h30 a 13h30 e comeza o sábado 28 de xaneiro, cunha sesión aberta.

Para apuntarse, podes escribir a cursos@gentalha.org

Máis abaixo tedes toda a información, pero para calquera dúbida podedes chamar aos números 654 25 42 39 e 618 21 23 51. 

Coa ilusión de sentirme aliada no camiño de moitos homes cara atopar xeitos de vivir máis humanos para eles e para todas/os nós, para o planeta… Graciñas por iniciativas coma esta! Que teñades moito éxito!

“Objectivos: Tomar consciência e construir colectivamente um discurso crítico, através de dinámicas e jogos corporais, arredor da construçom masculina na nossa sociedade, os privilégios associados a esta e as violências que exercemos.

Obter ferramentas para minguar as nossas violências machistas e aprender a responsabilizar-nos delas com o objectivo de nom repeti-las.

Facilitar o caminho e dar ferramentas e recursos para que as pessoas participantes, de forma individual ou colectiva, trabalhem os seus privilégios, violências e masculinidades de jeito autónomo e sostido no tempo.

Metodologias: Guiamo-nos polas metodologias da educaçom popular integrando ferramentas da facilitaçom de grupos, o teatro da oprimida, entre outras.

Programa e calendarizaçom (24h):

Bloco I (9h): Talher 1: Sábado 28 de janeiro – Sessom aberta em que nos centraremos em conhecer-nos, fazer grupo e entrarmos em matéria.

Talher II: DOMINGO 5 de fevereiro – Como é a construçom masculina. Os estereótipos masculinos que levamos dentro.

Talher III: Sábado 11 de fevereiro – A masculinidade hegemónica. Quanto tenho dela e quanto nom.

Bloco II (9h): Talher IV: Sábado 25 de fevereiro – Os privilégios. Som realmente consciente do que implica ser home?

Talher V: Sábado 4 de março – O que nos acontece quando nos acusam de machismo? (I). Porque nos resistimos e como empatizar com a pessoa agredida.

Talher VI: Sábado 11 de março – O que nos acontece quando nos acusam de machismo? (II). Como responsabilizar-nos dos nossos actos.

Bloco III (6h): Talher VII: Sábado 25 de março – O que podemos fazer para continuar o trabalho? Como priorizar a luita feminista nas nossas vidas.

Talher VIII: Sábado 1 de abril – Jeitos de organizar-nos, partilha de recursos e feche

Preço: O custe será 37 euros (pessoas associadas à A.C. Gentalha do Pichel) ou 40 euros (pessoas nom associadas) em duas quotas: fevereiro e março. Nom queremos que a questom económica seja um problema para ninguém. Facilitaremos todo o possível o fraccionamento e/ou reduçom do pago a pessoas que o precisem e queiram participar.

Autocoñecemento para o cambio – Xaneiro 2023

E para empezar o ano… un obradoiro para mulleres:  Autocoñecemento para o cambio. Será en Compostela, os domingos 29 de xaneiro, 12 e 26 de febreiro, e 12 de marzo 2023, en horario de 10h30 a 18h.

Un tempo para min, un tempo para parar, un tempo para escoitarme. Imos ver que nos gusta e que non nos gusta da nosa vida e adquirir ferramentas de transformación. Imos aprender a estar no noso corpo e a sentirnos ben na nosa pel… Imos ver como vivir desde o Botrato, re-conectadas coa nosa enerxía vital.

Para todo iso, traballaremos a nosa linguaxe corporal: autopercepción corporal e integración corporal, respiracións e relaxacións… Traballaremos o corpo da dignidade, os auto-agasallos, coidar e deixarme coidar, a familia afectiva…

Queremos facer un camiño para ser donas da nosa vida… Un camiño para vivir felices e en paz coa nosa vida. Un camiño cara a unha saúde integral.

Se todo isto che resoa, se queres máis información ou queres apuntarte, chama ao 639 20 36 69 antes do xoves 19 de xaneiro.

Podes facer extensiva esta invitación a outras mulleres da túa vida: amigas, parellas, irmás, fillas, colegas, veciñas…

Para facilitar a participación de todas, contaremos coma sempre con tres tipos de matrícula:  a normal (190€), a reducida para compañeiras en paro (a negociar con antelación) e a solidaria (unha matrícula voluntaria para as que queirades compartir con outras compañeiras).

Moita luz, moito botrato, moita vida para este ano que comeza… Unha apertiña.