Arquivo da categoría: Obradoiros

Soltando Guións de Vida que nos mancan – Obradoiro

Benqueridas compañeiras

Velaí esta invitación para un novo espazo de encontro desde o botrato: o obradoiro teórico-práctico SOLTANDO OS GUIÓNS DE VIDA QUE NOS MANCAN.

Un guión de vida é algo que repetimos inconscientemente unha e outra vez, un xeito de facer, unha maneira de ver o mundo. Imos parar a identificar eses guións de vida vellos que nos limitan e nos mancan, que nos producen minusvaloración e dor. E imos aprender tamén como percorrer novas rutas que nos gusten e emocionen, que nos dean enerxía e ganas de vivir.

Vai ser en Compostela, os domingos 16 e 30 de outubro, e 20 e 27 de novembro, en horario de 10h30 a 18h.

Desta volta podes facer extensiva esta invitación a outras mulleres da túa vida: amigas, parellas, irmás, fillas, colegas, veciñas…

Tés máis información na convocatoria máis abaixo.

Apertiña.

JPG

Xornada do Reencontro de Verán/Outono 2022

Ola, ola, compañeiras

Xa case rematado o verán, estou a pensar na vindeira Xornada do Reencontro Verán/Outono 2022! Vai ser o domingo 18 de setembro en Compostela, de 10h30 a 18h. De seguro que nos vai encantar a todas escoitarnos, arrouparnos, dármonos mimos e compartir  esperanza…  En definitiva, aproveitar esta nova oportunidade –unha máis!- para vernos, estar, acompañarnos…

Desta volta a invitación é a introducirnos na Meditación Corporal do Reencontro, que algunhas de vós xa coñecedes… A Meditación Corporal é un método que fun creando a partir das ferramentas da Terapia de Reencontro e da miña propia experiencia; un xeito sinxelo de parar con nós mesmas e conectar coas nosas partes máis saudables para colocarnos desde aí na nosa vida…

Ben, pois ide reservando data nas vosas axendas… A data límite para apuntarse é o venres 9 de setembro.

Coma sempre, a achega económica vai ser voluntaria, poñeremos un peto alí na sala. Tedes toda a información nas convocatorias que aparecen en Anexo.

Recordade que a Xornada do Reencontro é para mulleres que teñades participado nalgún obradoiro anteriormente así que, neste caso, non reenviedes a convocatoria.

Apertiñas cálidas. Dáme moita alegría compartir esta invitación con todas vós.

XR 022 - JPG

E da Xornada do Reencontro de Primavera 2002

Unha fotiña, compañeiras, para anclar na nosa memoria persoal e colectiva canto vivimos na Xornada do Reencontro de Primavera 2022 na que nos xuntamos 13 mulleres a explorar, fantasear, crear… na que nos escoitamos, nos sentimos, nos comprendemos, nos valoramos no que somos…

Graciñas, porque xuntas fixemos posible que o Botrato se fixera realidade unha vez máis!!!

04. Foto

Relacións afectivas e vínculos amorosos para o Botrato – Obradoiro

Ésta é unha invitación para o obradoiro de VÍNCULOS AFECTIVOS E RELACIÓNS AMOROSAS PARA O BOTRATO; un espazo vivencial teórico-práctico para mulleres que vai comezar en Compostela este vindeiro mes de marzo.

Un espazo para ver como me coloco nas miñas relacións afectivas: constrúo relacións que me desgastan e me sacan enerxías ou vínculos que me fan ben e me nutren?

Imos comprender os dinamismos dos procesos amorosos: a sedución e o namoramento, a fusión e a separación, os negociables e os innegociables…

Miraremos como construír espazo persoal e espazo compartido desde os diferentes modelos de relación. E tamén nos achegaremos aos procesos de desamor para ver como atravesar rupturas e facer despedidas.

Queremos colocarnos en relacións de botrato e así construír fermosos proxectos de amor para as nosas vidas.

Por suposto, podes facer extensiva esta invitación a outras mulleres da túa vida: amigas, irmás, fillas, parellas, colegas…

Para apuntarte, chama ao 639 20 36 69 antes do luns 28 de febreiro.

Coma sempre, as prazas van ser limitadas, sobre todo tendo en conta as precaucións pola pandemia.

Unha apertiña.

Xornada do Reencontro 2021

Benqueridas compañeiras

Como estades? Como están as vosas familias, a vosa xente máis querida? Como foi indo o verán? Como está sendo retomar o ritmo de a diario?

Este mes imos ter a Xornada do Reencontro! Unha oportunidade para vernos, estar… Vivimos moitas cousas todos estes meses pasados: situacións inesperadas, moitas veces dolorosas, algunhas abríndonos a novos lugares vitais… De seguro que nos vai encantar xuntarnos para escoitarnos, compartir, arrouparnos, sentírmonos en colectivo… Desde o corazón, desde o corazón da Terra, desde o corazón da Vida.

Desta volta, a Xornada do Reencontro vai ser o sábado 25 de setembro, no Local Social de Pontepedriña.

Este ano, excepcionalmente por cuestións das restricións do Covid imos facelo do seguinte xeito:

          1. Apuntarnos ao grupo da mañá (de 10h a 14h) ou no grupo da tarde (de 16h a 20h)

          2. Se chove, déixannos estar na sala un grupo de 6. Se fai bo tempo, poderemos estar no parque do   local social e ampliar o  grupo ata 10

          3. Se fai bo, faremos xuntas o xantar no parque do local social: o grupo da mañá e o grupo da tarde. Se chove, xantaremos cadaquén pola nosa conta

Ben, pois ídevos apuntando antes do domingo 19 de setembro… E ide reservando dataaaaaaa nas vosas axendas!!!

Recordade que a Xornada do Reencontro é exclusivamente para mulleres que teñades participado nalgún obradoiro así que, neste caso, NON reenviedes a convocatoria.

Coma sempre, a achega económica vai ser voluntaria, poñeremos un peto alí na sala.

Unha apertiña e moito, moito Botrato para as vosas vidas!!!

Autocoidado e Autocoñecemento para o Botrato Obradoiros en Arcade (Soutomaior) e Ponte Caldelas

Benqueridas compañeiras

Este ano, abrimos estas dúas convocatorias de obradoiro a través dos CIM de Arcade (Soutomaior) e Ponte Caldelas, ambos espazos de balde.

A situación que estamos a vivir a raíz do coronavirus é unha situación complexa na que brotan en nós medos do pasado, inseguridades do presente, incertezas de futuro… Sentímonos como nun labirinto sen saber como saír del.

Necesitamos aprender a acompañarnos, conectarnos coa enerxía vital para seguir vivindo desde o autocoidado. Estes dous cursos ofrecen ferramentas para iso, para aprender a manexar este e outros cambios que nos desorientan, nos desbordan, nos xeran confusión… E colocarnos na saúde e no Botrato

Como podedes supoñer,  imos construír un espazo con todas as medidas de seguridade necesarias. Por este motivo, os grupos van ser moi limitados: máximo 9 persoas.

Non perdas a oportunidade!!! Mira datas e horarios… e apúntate!!!

1. Autocoidado para o Botrato en tempos de coronavirus – Arcade (Soutomaior) – Luns 14, 21 e 28 de setembro, e 05 e 19 de outubro, de 10h a 13h. Para apuntarse, chamar ao CIM (986 70 12 27) antes do 7 de setembro.

2. Autocoñecemento para o Botrato en tempos de coronavirus – Ponte Caldelas – Martes 15 e 29 de setembro, e 13 e 27 de outubro, de 10h a 13h OU Martes 22 de setembro, 06 e 20 de outubro, 03 de novembro, de 16h a 20h. Para apuntarse, chamar ao concello (986 75 00 13) antes do 11 de setembro.

Relacións afectivas e vínculos amorosos para o BoTrato – Obradoiro en Compostela

Benquerida compañeira

Co novo ano recen estreado, seguimos nesta nosa andaina de medrar en autonomía persoal e consciencia, de construírmonos vidas en liberdade e harmonía para nós e para o planeta…

Con esta teima, mándoche esta invitación para o obradoiro de VÍNCULOS AFECTIVOS E RELACIÓNS AMOROSAS que vai comezar en Compostela este vindeiro mes de febreiro.

 

Un espazo para ver como me coloco nas miñas relacións afectivas… Constrúo relacións que me desgastan e me sacan enerxías? Constrúo vínculos que me fan ben e me nutren?

Imos comprender os dinamismos dos procesos amorosos: a sedución e o namoramento, a fusión e a separación, os guións de vida, os negociables e os innegociables…

Miraremos como construír espazo persoal e espazo compartido desde os diferentes modelos de relación. E tamén nos achegaremos aos procesos de desamor para ver como atravesar rupturas e facer despedidas.

Queremos colocarnos en relacións de botrato, conectando coa nosa creatividade. E desde aí construír fermosos proxectos amorosos para as nosas vidas.

Podes facer extensiva esta invitación a outras mulleres da túa vida: amigas, irmás, fillas, parellas, colegas…

Para apuntarte, podes chamarme antes do mércores 22 de xaneiro ao 639 20 36 69 . Coma sempre, as prazas van ser limitadas.

Unha apertiña.

Os cambios na vida – Obradoiro en Compostela

Benquerida compañeira

Envíoche a convocatoria do obradoiro OS CAMBIOS NA VIDA que imos realizar en Compostela os sábados 26 de outubro, 9 e 23 de novembro, e 7 e 21 de decembro 2019, en horario de 10h30 a 18h.

Podes facer extensiva esta invitación a outras mulleres da túa vida que poidan estar interesadas.

Unha apertiña.